हैदराबाद सहल भाग २
आज
सहलीचा दुसरा दिवस. सकाळी सहा वाजता जाग आली. उठल्यावर मुखमार्जन झाल्यावर आंघोळ करुनच बाथरुम बाहेर आलो. त्यानंतर
चहाची सोय बघायला हॉटेलच्या बाहेर पडलो. जवळच एक चहाची टपरी वजा दुकान होते. तिथे चहा
घेतला आणि रुमवर नेण्याकरीता चहा आणि कॉफी पार्सल घेतली. विशेष म्हणजे चहावाला चक्क
मराठीत बोलत होता. सगळ्यांच्या आंघोळी वगैरे झाल्यावर आम्ही कालच्याच कॅफेटेरीया मध्ये
नाश्ता करायला गेलो. नाश्ता मात्र एकदम झकास होता. नाश्त्याला एवढे पदार्थ आपण घरी
कधीच खात नाही.
इथे
नाश्त्याला सँडवीच, ब्रेड, बटर, जाम, इडली, मेदू वडा, उपमा किंवा पोहे, डोसे, चटणी,
सांबार शिवाय फ्रेश फ्रुट ज्युस एवढे पदार्थ होते तेही अनलिमिटेड. सर्वचजण भरपेट नाश्ता
करुन हैदराबाद दर्शनच्या दुसऱ्या टप्याकरीता तयार झालो. कालचीच मिनी बस सेवेकरीता हॉटेल
बाहेर हजर होती. सुरवातिला जवळच असलेल्या हरे राम हरे कृष्ण मंदिरात गेलो. तेथिल स्वच्छता
टाप टीप बघण्यासारखी होती. अतिशय शांत वातावरण असलेल्या या मंदिरात जाऊन मन प्रसन्न
झाले. इस्कॉन या संस्थे तर्फे या मंदिराचे व्यवस्थापन केले जाते. मंदिराच्या परिसरातच
पूजा साहित्य आणि पुस्तकांचे स्टॉल होते. त्यात तेलगु भाषे बरोबरच हिंदी आणि इंग्रजी
पुस्तके विक्री करीता उपलब्ध होती. जवळच एक शुद्ध स्वरुपात (orgnic)मिळणाऱ्या दैनंदिन उपयोगाच्या
वस्तुंचे देखिल दुकान होते. तेथे मी व्हीक्स वेपोरब सारख्या डोकेदुखी
आणि सर्दीवर उपयोगी असणाऱ्या औषधाची कुपी घेतली.
त्यानंतर
आम्ही हैदराबादचे आकर्षण असणाऱ्या विंटेज कारचे प्रदर्शन पहायला गेलो. सुधा कार म्युझियम
असे नांव असणारे हे ठिकाण खरोखरच अद्वितिय आहे. इथे निरनिराळ्या आकाराच्या, निरनिराळ्या
मॉडेलच्या, निरनिराळ्या काळातल्या उत्कृष्ट गाड्यांचे प्रदर्शन आहे. विशेष म्हणजे येथे
ठेवलेली प्रत्येक गाडी चालू स्थितीत आहे. मोटर सायकल, सायकल यांचे देखिल नमुने येथे
बघायला मिळाले.
येथे
केक, पिझा, शंकराची पिंडी, डायनिंग टेबल, क्रिकेटची बॅट, पेन्सिल, खोड रबर, पुस्तक,
पोपटाचा पिंजरा, होडी, कोच, आगगाडी, हेल्मेट, कमोड, चहाचा कप, बस, क्रिकेटचा बॉल, कमळाचे
फुल अशा अनेक प्रकारच्या आकाराच्या गाड्या तेथे होत्या. त्यामध्ये सिंगल सिट, डबल सिट,
चार सिट अशाही गाड्या होत्या. म्यझियमचा सर्व परिसर अत्यंत स्वच्छ होता. प्रत्येक गाडीची
माहिती मोजक्या शब्दांत प्रत्येक गाडीवर लावलेली होती. तेथे एकदंर पाच हॉल होते. प्रत्येक
हॉलमध्ये गाड्यांची माहिती सांगण्याकरीता मुली हजर होत्या.
सुमारे
दिड ते दोन तास एका वेगळ्याच वातावरणांत गेले. या सर्व गाड्यांचा संग्रह करण्याकरीता
आणि त्यांची देखभाल करण्या करीता येणाऱ्या खर्चाचा विचार करता तेथे असलेली प्रवेश फी
अगदी जुजबी वाटली. हैदराबाद मध्ये गेल्यावर आवर्जुन पहावे असे हे ठिकाण आहे.
कार
म्युझियम पाहून झाल्यावर पोटात भूक लागल्याची जाणिव झाली. तेथुन जवळच असणाऱ्या कालच्याच
बालाजी धाब्यावर जेवायला गेलो. कालच्या प्रमाणेच पाण्याच्या बाटल्यांचे बॉक्स तेथेच
खरेदी केले. त्यानंतर आम्ही हूसैन सागरच्या लगतच असलेल्या एन् टी आर् गार्डन मध्ये
गेलो. हे गार्डन खूप मोठ्या परिसरात साकारले आहे. या गार्डन मध्ये अनेक प्रकारचे गेम
होते. लहाना पासून मोठ्यांपर्यंत सर्वांना आनंद मिळेल असे अनेक प्रकार तिथे उपलब्ध
होते. आंध्र प्रदेशच्या गळ्यातले ताईत असणाऱ्या एन् टी रामाराव यांच्या स्मृती प्रित्यर्थ
हे गार्डन उभारले गेले आहे. येथे आम्ही टॉय ट्रेनमध्ये बसुन परत एकदा बालपण अनुभवले.
त्यानंतर डेंजर झोन, wonder la, या शिवाय थ्रीडी शो या मध्ये भाग घेतला.
एन्
टी आर् गार्डन मधिल मजा मस्ती आटोपुन आम्ही हूसैन सागर मधिल भगवान बुद्धांच्या भव्य
पुतळ्याच्या दर्शनाला जाणाऱ्या बोटीमध्ये बसलो. हूसैन सागर हा तलाव हैदराबाद आणि त्याचे
जुळे शहर सिंकदराबादला जोडणारा दुवा आहे. या तलावामध्ये असणारा १८ मिटर उंच
असणारा भगवान बुद्धांचा पुतळा पांढऱ्या संगमरवरा पासुन बनवला आहे. हा पुतळा जागेवर
बसविण्याकरीता दिनांक १० मार्च १९९० ला आणला होता परंतु होडीवरुन सुमारे १०० यार्ड
गेल्यावर तो पुतळा कलंडला आणि पाण्याखाली गेला. या अपघातात १० मजुर मृत्यूमुखी पडले
होते. त्यानंतर २००६ मध्ये त्याची स्थापना करण्यांत आली होती. त्याच्या स्थापने करीता
दलाई लामा आले होते.
हूसैन
सागरच्या लगतच असणाऱ्या लुंबिनी पार्कमध्ये संगित आणि रंगित प्रकाश यांच्या सहाय्याने
डान्सिंग फाउंटनचा एक आकर्षक शो आम्ही पाहीला. हल्ली अशाप्रकारचे शो सर्व प्रसिद्ध
ठिकाणी दाखवले जातात. जामनगरमध्ये जामनगरचा इतिहास सांगणारा, सोमनाथला सोमनाथचा इतिहास
सांगणारा असे शो मी या पूर्वी पाहिले आहेत.
या
शोनंतर आजचा हैदराबाद दर्शनचा भाग संपवुन आम्ही हॉटेलवर परत आलो. रोजच्या प्रमाणे जेवण
झाल्यावर थोड्या गप्पा आणि पत्ते असा कार्यक्रम झाला. उद्याचा पूर्ण दिवस रामोजी फिल्म
सिटी करीता राखुन ठेवला आहे.
*******
कोणत्याही टिप्पण्‍या नाहीत:
टिप्पणी पोस्ट करा